ភ្នំពេញ៖ តំណាងកម្ពុជាប្រចាំ អង្គការសហប្រជាជាតិ បានឆ្លើយតបទៅនឹងការលើកឡើងរបស់តំណាងសហរដ្ឋអាមេរិក និងបារាំង ចំពោះការអនុវត្តន៍ច្បាប់ និងប្រជាធិបតេយ្យនៅកម្ពុជា ដោយតំណាងកម្ពុជា ស្នើឱ្យប្រទេសទាំងនោះអនុវត្តន៍ការគោរពសិទ្ធិមនុស្សក្នុងប្រទេសខ្លួនឯងសិន។

តំណាងអចិន្ដ្រៃយ៍កម្ពុជាប្រចាំអង្គការសហប្រជាជាតិលោក អាន សុខខឿន បានប្រើសិទ្ធិឆ្លើយតបទៅនឹងគណប្រតិភូបារាំង និងអាមេរិក ដោយបានលើកឡើងថា កម្ពុជាបានត្រួសត្រាយផ្លូវសម្រាប់ការផ្ដល់នីតិសម្បទាធ្វើនយោបាយឡើងវិញ ដល់អតីតបក្សប្រឆាំង ដែលជាលទ្ធផលគឺមានការផ្ដល់សិទ្ធិដល់ពួកគេវិញជាបន្តបន្ទាប់ ហើយថែមទាំងបង្កើតបក្សនយោបាយថ្មីៗ មកប្រកួតប្រជែងការបោះឆ្នោតថែមទៀត។ លោកបន្តថា ការបន្តលើកយកតែមួយជ្រុងនៃបញ្ហា ដោយលំអៀងគឺកំពុងតែធ្វើឱ្យប៉ះពាល់ដល់សិទ្ធិមនុស្ស និងការអនុវត្តប្រជាធិបតេយ្យនៅកម្ពុជាហើយ។

លោកបានចោទជាសំណួរថា៖ « តើគណៈប្រតិភូទាំងពីរជឿថា សេចក្តីថ្លែងការណ៍របស់ខ្លួនមានសមាមាត្រឬទេ នៅពេលគណៈប្រតិភូទាំងពីរបំប៉ោងសិទ្ធិពលរដ្ឋ និងនយោបាយ ឱ្យសំខាន់លើសលុបជាងសិទ្ធិផ្សេងទៀត ដូចជាសិទ្ធិរស់រានមានជីវិត សុខភាព ទទួលបានម្ហូបអាហារ ការអប់រំ និងការអភិវឌ្ឍ? »

លោក អាន សុខខឿន ក៏បានលើកឡើងបន្ថែមទៀតថា ការតស៊ូមតិសិទ្ធិមនុស្សចាំបាច់ត្រូវតែចាប់ផ្ដើមពីប្រទេសខ្លួនឯងជាមុនសិន និងមិនត្រូវប្រើសិទ្ធិមនុស្សជាអាវុធនយោបាយវាយប្រហារប្រទេសដទៃ ដោយស្ដង់ដារពីរនោះទេ៕